अवैध लाकूड वाहतुकीवर पारध पोलिसांची कारवाई; ट्रक, ट्रॅक्टरसह लाकूड जप्त
विनापरवाना लाकूड वाहतूक करणाऱ्यांवर दोन दिवसांत दोन कारवाया; वनविभागाशी पत्रव्यवहार
पारध : जालना जिल्ह्यात अवैध धंदे आणि विनापरवाना वाहतुकीविरोधात कारवाई करण्याच्या सूचनांनुसार पारध पोलिसांनी १७ आणि १८ ऑक्टोबर रोजी दोन स्वतंत्र कारवाया केल्या. या कारवाईत लाकडाची विनापरवाना वाहतूक करणारा ट्रक आणि ट्रॅक्टर-ट्रॉलीसह लाकूड जप्त करण्यात आले. संबंधित प्रकरणांत पुढील कायदेशीर कारवाईसाठी वनविभागाशी पत्रव्यवहार करण्यात आला आहे.
ट्रकमधून लाकडाची विनापरवाना वाहतूक
दि. १७ ऑक्टोबर रोजी पोलिसांना मिळालेल्या माहितीच्या आधारे भोकरदनकडे जाणाऱ्या रस्त्यावर साई हॉटेलजवळ तपासणी करण्यात आली. यावेळी MH-04-FJ-1677 क्रमांकाच्या सहा टायरच्या टाटा ट्रकमधून लाकडाची वाहतूक होत असल्याचे आढळले. पोलिसांनी ट्रकचालकाची चौकशी केली असता, त्याने आपले नाव मक्तेदार खान शौकत खान पठाण (वय ४२, रा. अजिंठा, ता. सिल्लोड, जि. छत्रपती संभाजीनगर) असे सांगितले. ट्रकमध्ये लाकूड भरलेले असून, त्याच्या वाहतुकीसाठी आवश्यक परवाना नसल्याची माहिती चौकशीत समोर आली.
ट्रॅक्टर-ट्रॉलीसह लाकूड जप्त
दुसऱ्या कारवाईत दि. १८ ऑक्टोबर रोजी अवघडराव सांवगी परिसरातील शेतशिवारातून जाणाऱ्या रस्त्यावर महिंद्रा ५७५ डीआय कंपनीचा MH-30-J-7169 क्रमांकाचा ट्रॅक्टर ट्रॉलीसह आढळून आला. ट्रॉलीमध्ये लाकूड भरून वाहतूक केली जात असल्याची माहिती पोलिसांना मिळाली होती.
चौकशीदरम्यान ट्रॅक्टरचालकाने आपले नाव सय्यद सलीम सय्यद साबीर (वय ३५, रा. अवघडराव सांवगी, ता. भोकरदन, जि. जालना) असे सांगितले. लाकडाच्या मालकाबाबत विचारणा केली असता, कलीम करीम शहा (वय ४६, रा. अवघडराव सांवगी, ता. भोकरदन, जि. जालना) यांचे नाव समोर आले. लाकडाची वाहतूक आणि तोड करण्यासंबंधी आवश्यक परवाना नसल्याची माहिती चौकशीत समोर आली.
वनविभागाशी पत्रव्यवहार; पुढील कारवाई सुरू
दोन्ही कारवायांमध्ये ट्रक, ट्रॅक्टर-ट्रॉली आणि लाकूड पोलिसांनी ताब्यात घेतले. या प्रकरणाची माहिती वनविभागाला देण्यात आली असून, संबंधितांविरुद्ध पुढील कायदेशीर कारवाई करण्यासाठी पत्रव्यवहार करण्यात आला आहे. अवैध लाकूड वाहतुकीविरोधात पारध पोलिसांनी केलेल्या या कारवाईमुळे विनापरवाना वाहतूक करणाऱ्यांवर कारवाईचा इशारा देण्यात आला आहे.
वरिष्ठांच्या मार्गदर्शनाखाली कारवाई
पोलीस अधीक्षक तेगबीर सिंह संधू यांच्या सूचनेनुसार, अपर पोलीस अधीक्षक विक्रम साळी, उपविभागीय पोलीस अधिकारी कटके तसेच संबंधित पोलीस अधिकारी व अंमलदार यांच्या मार्गदर्शनाखाली ही कारवाई करण्यात आली. पोलीस अंमलदार सुनील जाधव, संतोष जाधव, वैभव थिंगळे आणि सुरेश पाटील यांनी कारवाईत सहभाग घेतला.
अवैध लाकूड वाहतुकीला आळा घालण्यासाठी पोलिसांकडून तपासणी आणि कारवाई सुरू असून, विनापरवाना वाहतूक आढळल्यास संबंधितांवर कायदेशीर कारवाई करण्यात येणार असल्याचे प्रसिद्धीपत्रकात नमूद करण्यात आले आहे.
प्रतिनिधी महेंद्र बेराड
