पारध येथे 15 ऑगस्टनिमित्त ग्रामसभा न घेतल्याने ग्रामस्थांमध्ये नाराजी
लवकर ग्रामसभा घेऊन घरकुल लाभार्थ्यांची यादी जाहीर करण्याची महेंद्र बेराड यांची मागणी
पारध, ता. भोकरदन, जि. जालना : 15 ऑगस्ट स्वातंत्र्यदिनानिमित्त ग्रामपंचायतीमार्फत ग्रामसभा घेणे अपेक्षित असताना पारध येथे अद्याप ग्रामसभा घेण्यात आलेली नसल्याने ग्रामस्थांमध्ये नाराजी व्यक्त होत आहे. ग्रामसभेच्या माध्यमातून गावातील विविध विकासकामे, शासकीय योजनांचा लाभ, नागरिकांच्या समस्या तसेच प्रलंबित प्रश्नांवर चर्चा होणे अपेक्षित असते. मात्र ग्रामसभा न झाल्याने ग्रामस्थांना आपल्या समस्या मांडण्यासाठी व्यासपीठ मिळालेले नाही.
दरम्यान, पारध येथे तातडीने ग्रामसभा आयोजित करून गावातील विविध प्रश्नांवर सविस्तर चर्चा करावी, अशी मागणी सामाजिक कार्यकर्ते महेंद्र बेराड यांनी केली आहे.
विशेषतः प्रधानमंत्री आवास योजना (घरकुल) अंतर्गत गावातील पात्र लाभार्थ्यांची यादी ग्रामसभेसमोर जाहीर करून पारदर्शक पद्धतीने तपासणी करावी, अशी मागणी करण्यात आली आहे. तसेच यापूर्वी पात्र असूनही घरकुलाच्या यादीतून वंचित राहिलेल्या नागरिकांची पुन्हा सर्वंकष पाहणी व सर्वेक्षण करून त्यांची नावे पात्र यादीत समाविष्ट करावीत, अशीही मागणी बेराड यांनी केली आहे.
गावातील गरजू व पात्र कुटुंबांना शासनाच्या घरकुल योजनेचा लाभ मिळणे हा त्यांचा हक्क असून, कोणतेही पात्र कुटुंब केवळ यादीतील त्रुटी किंवा सर्वेक्षणातील दुर्लक्षामुळे लाभापासून वंचित राहू नये. त्यामुळे ग्रामसभेत लाभार्थी यादीची पारदर्शकपणे पडताळणी करून पात्र व वंचित लाभार्थ्यांना न्याय द्यावा, अशी भूमिका महेंद्र बेराड यांनी मांडली.
तसेच ग्रामसभेत गावातील रस्ते, पाणी, स्वच्छता, आरोग्य, शिक्षण, पायाभूत सुविधा आणि इतर विकासकामांवरही चर्चा करून नागरिकांच्या सूचना व हरकती नोंदवाव्यात, अशी मागणी करण्यात आली आहे.
ग्रामपंचायत प्रशासनाने विलंब न करता ग्रामसभा घेऊन ग्रामस्थांच्या प्रश्नांवर चर्चा करावी आणि घरकुल योजनेतील पात्र तसेच वंचित लाभार्थ्यांना न्याय द्यावा, अशी मागणी महेंद्र बेराड यांनी केली आहे.
