महाराष्ट्राच्या राजकारणात मोठी खळबळ; ठाकरे गटातील ६ खासदार शिंदे गटाच्या संपर्कात असल्याची चर्चा
मुंबई : राज्याच्या राजकारणात पुन्हा एकदा मोठ्या राजकीय घडामोडींना वेग आला आहे. शिवसेना (उद्धव बाळासाहेब ठाकरे) पक्षातील सहा खासदार शिंदे गटाच्या संपर्कात असल्याची चर्चा रंगली असून, या पार्श्वभूमीवर दिल्लीत राजकीय हालचालींना वेग आला आहे. काही वृत्तांनुसार संबंधित खासदारांनी दिल्लीत तळ ठोकला असून लोकसभा अध्यक्षांची भेट घेण्याची शक्यता वर्तवली जात आहे.
सूत्रांच्या माहितीनुसार, उपमुख्यमंत्री एकनाथ शिंदे हे देखील दिल्लीत दाखल झाले असून संभाव्य राजकीय समीकरणांबाबत चर्चा सुरू असल्याचे सांगितले जात आहे. “ऑपरेशन टायगर” या नावाने ओळखल्या जाणाऱ्या या घडामोडींमुळे ठाकरे गटात अस्वस्थता निर्माण झाल्याची चर्चा आहे
दरम्यान, ठाकरे गटातील काही खासदार शिंदे गटात जाण्याच्या तयारीत असल्याचा दावा विविध माध्यमांनी केला असला, तरी याबाबत अद्याप कोणतीही अधिकृत घोषणा झालेली नाही. ठाकरे गटाकडूनही फुटीच्या चर्चा फेटाळण्यात आल्या असून सर्व खासदार पक्षासोबत असल्याचा दावा करण्यात आला आहे.
राजकीय वर्तुळात चर्चेत असलेल्या नावांमध्ये काही विद्यमान खासदारांचा समावेश असल्याचे सांगितले जात असले, तरी अंतिम निर्णय आणि अधिकृत भूमिका अद्याप स्पष्ट झालेली नाही. या घडामोडींमुळे महाराष्ट्राच्या राजकारणात पुन्हा एकदा मोठा राजकीय भूकंप होण्याची शक्यता व्यक्त केली जात आहे.
सध्या सर्वांचे लक्ष दिल्लीतील बैठका, लोकसभा अध्यक्षांची संभाव्य भेट आणि पुढील अधिकृत घोषणांकडे लागले आहे. या प्रकरणात पुढील काही तास महत्त्वाचे ठरणार असल्याचे राजकीय निरीक्षकांचे मत आहे.
पत्रकार उमेश कुलकर्णी
