*जळगाव एसटी आगारात कास्ट्राईब संघटनेचा मोठा एल्गार – आगार व्यवस्थापक संदीप पाटील यांच्या हुकूमशाही विरोधात 6 ऑक्टोबरपासून साखळी उपोषण*
*जळगाव:* महाराष्ट्र राज्य परिवहन महामंडळाच्या जळगाव विभागात सध्या मोठा वाद पेटला आहे. *कास्ट्राईब राज्य परिवहन कर्मचारी संघटना, महाराष्ट्र* या संघटनेने जळगाव आगाराचे आगार व्यवस्थापक *श्री. संदीप पाटील* यांच्या विरोधात थेट रणशिंग फुंकले आहे.
*काय आहे नेमके आरोप?*
संघटनेने दिलेल्या निवेदनानुसार, श्री. संदीप पाटील हे गेल्या 3 वर्षांपासून जळगाव आगारात कार्यरत आहेत. या काळात त्यांनी:
1. *मनमानी व हुकूमशाही पद्धतीने कारभार* केल्याचा आरोप.
2. शिस्त व आवेदन पद्धतीचा स्वतःच्या फायद्यासाठी गैरवापर.
3. एसटी महामंडळाचे आर्थिक नुकसान करणे.
4. कर्मचाऱ्यांचे पद वेगळे असताना त्यांना वेगळेच काम देणे.
5. महामंडळाचे सर्व नियम व अटींची पायमल्ली केल्याचा गंभीर आरोप करण्यात आला आहे.
या अधिकाऱ्याला भ्रष्ट व कर्तव्यशून्य अधिकारी असे संबोधत, त्यांची तात्काळ जळगाव विभागातून बदली करून निष्पक्ष चौकशी करून कायदेशीर कारवाई करावी, अशी मागणी संघटना करत आहे.
*दीड महिना झाला, प्रशासन झोपेतच!*
या संदर्भात संघटनेने दि. *17 ऑगस्ट 2026* रोजीच वरिष्ठ प्रशासनाला लेखी नोटीस दिली होती. नोटीस देऊन जवळपास दीड महिना उलटला तरी वरिष्ठ अधिकाऱ्यांनी कोणत्याही प्रकारची चौकशी केलेली नाही, किंवा संबंधित आगार व्यवस्थापकांविरोधात कोणतेही पाऊल उचललेले नाही.
“कर्मचाऱ्यांचा आवाज दाबण्याचा प्रयत्न प्रशासनाकडून होत आहे. झोपी गेलेल्या प्रशासनाला जागे करण्यासाठी आम्हाला हा मार्ग अवलंबावा लागत आहे,” असे उपोषणकर्त्यांनी निवेदनात म्हटले आहे.
*06 ऑक्टोबरपासून साखळी उपोषण, नंतर आमरण उपोषणाचा इशारा*
पूर्वी आमरण उपोषण करण्याचा निर्णय घेतला होता, मात्र आता त्यात बदल करून *दि. 06 ऑक्टोबर 2026 पासून साखळी उपोषण* सुरू करण्याचा निर्णय घेण्यात आला आहे.
जर साखळी उपोषण करूनही न्याय मिळाला नाही, तर नाईलाजास्तव पुन्हा आमरण उपोषण सुरू केले जाईल, असा थेट इशारा देण्यात आला आहे.
उपोषण काळात उपोषणकर्त्यांच्या किंवा त्यांच्या कुटुंबियांच्या जीविताचे बरे-वाईट झाल्यास त्यास सर्वस्वी प्रशासन जबाबदार राहील, तसेच या आंदोलनामुळे एसटीच्या कामकाजावर परिणाम झाल्यास त्यास आम्ही जबाबदार राहणार नाही, असेही निवेदनात स्पष्टपणे नमूद करण्यात आले आहे.
या आंदोलनामुळे जळगाव बसस्थानकावर मोठी खळबळ उडाली असून, वरिष्ठ अधिकारी यावर काय निर्णय घेतात याकडे संपूर्ण जळगाव जिल्ह्याचे लक्ष लागले आहे.
प्रतिनिधी सोमेश मुळे
