बीबीएम ‘सीईटी’ला विद्यार्थ्यांचा उत्स्फूर्त प्रतिसाद; राज्यभरात ८७.६६ टक्के उपस्थिती
पुणे: राज्य सामाईक प्रवेश परीक्षा कक्ष (CET Cell) तर्फे शैक्षणिक वर्ष २०२६-२७ साठी घेण्यात आलेल्या बी.एचएमसीटी, बीसीए, बीबीए, बीबीएम, बीएमएस तसेच एमबीए आणि एमसीए (इंटिग्रेटेड) अभ्यासक्रमांच्या प्रवेश परीक्षेला राज्यभरातून विद्यार्थ्यांचा मोठा प्रतिसाद मिळाला. २८ आणि २९ एप्रिल रोजी पार पडलेल्या या परीक्षेत एकूण ८७.६६ टक्के उपस्थिती नोंदवण्यात आली.
राज्यातील ३६ जिल्ह्यांमधील १३२ परीक्षा केंद्रांवर संगणक आधारित पद्धतीने परीक्षा घेण्यात आली. एकूण ७१,०६७ विद्यार्थ्यांनी नोंदणी केली होती. त्यापैकी ६२,३०१ विद्यार्थ्यांनी प्रत्यक्ष परीक्षा दिली, तर ८,७६६ विद्यार्थी अनुपस्थित राहिले.
दिवसनिहाय परीक्षा चित्र
पहिला दिवस (२८ एप्रिल):
१३२ केंद्रांवर परीक्षा पार पडली. ३५,५९४ नोंदणीकृत विद्यार्थ्यांपैकी ३१,०६८ विद्यार्थी उपस्थित राहिले, तर ४,५२६ विद्यार्थी गैरहजर होते.
दुसरा दिवस (२९ एप्रिल):
११९ केंद्रांवर परीक्षा झाली. ३५,४७३ विद्यार्थ्यांनी नोंदणी केली होती. त्यापैकी ३१,२३३ विद्यार्थ्यांनी परीक्षा दिली, तर ४,२४० विद्यार्थी अनुपस्थित राहिले.
शैक्षणिक क्षेत्रातील महत्त्वाचा बदल
यंदापासून बी.एचएमसीटी, बीसीए, बीबीए, बीबीएम आणि बीएमएस या अभ्यासक्रमांना अखिल भारतीय तंत्रशिक्षण परिषद (AICTE) अंतर्गत व्यावसायिक दर्जा देण्यात आला आहे. त्यामुळे या अभ्यासक्रमांसाठी आता प्रथमच सीईटी सेलमार्फत एकत्रित प्रवेश परीक्षा घेण्यात आली. यापूर्वी प्रवेश प्रक्रिया संबंधित महाविद्यालये किंवा संस्थांकडून स्वतंत्रपणे राबवली जात होती.
विद्यार्थ्यांसाठी नवी दिशा
या बदलामुळे प्रवेश प्रक्रियेत अधिक पारदर्शकता, एकसमानता आणि राज्यभरातील विद्यार्थ्यांना समान संधी उपलब्ध होणार असल्याचे शिक्षण क्षेत्रातील तज्ज्ञांचे मत आहे. राज्यभरातील मोठ्या प्रतिसादामुळे व्यावसायिक शिक्षणाकडे विद्यार्थ्यांचा वाढता कलही स्पष्ट झाला आहे.
प्रतिनिधी उमेश कुलकर्णी
9822548429
