मोशी कचरा डेपो दुर्घटनेतील मृत नागेश गायकवाड यांच्या पत्नीचा मृत्यू; आत्महत्येची शक्यता
भोसरी, दि. १३ ऑगस्ट २०२६ : मोशी कचरा डेपो दुर्घटनेत पती नागेश गायकवाड यांचा मृत्यू झाल्यानंतर त्यांच्या पत्नीचाही मृत्यू झाल्याची धक्कादायक घटना समोर आली आहे. या घटनेमुळे गायकवाड कुटुंबावर पुन्हा एकदा दुःखाचा डोंगर कोसळला असून, परिसरात हळहळ व्यक्त होत आहे.
मोशी कचरा डेपो येथे झालेल्या दुर्घटनेत नागेश गायकवाड यांचा मृत्यू झाला होता. या घटनेच्या धक्क्यातून कुटुंब सावरत असतानाच त्यांच्या पत्नीचा मृत्यू झाल्याने कुटुंबीयांवर मोठे संकट ओढवले आहे.
या घटनेची नोंद एमआयडीसी भोसरी पोलीस ठाण्यात अकस्मात मृत्यू म्हणून करण्यात आली आहे. मृत्यूचे नेमके कारण अद्याप स्पष्ट झालेले नसून, पोलिसांकडून या प्रकरणाचा तपास सुरू आहे.
दरम्यान, प्राथमिक माहितीनुसार गायकवाड यांच्या पत्नीने आत्महत्या केली असण्याची शक्यता व्यक्त केली जात आहे. मात्र, आत्महत्येची अधिकृत पुष्टी पोलिसांकडून करण्यात आलेली नाही. शवविच्छेदन अहवाल तसेच तपासातूनच त्यांच्या मृत्यूचे नेमके कारण स्पष्ट होणार आहे.
पतीच्या मृत्यूनंतर काही काळातच पत्नीचाही मृत्यू झाल्याने या घटनेने परिसरात खळबळ उडाली आहे. गायकवाड यांच्या पत्नीच्या मृत्यूमागील नेमकी परिस्थिती काय होती, याचा एमआयडीसी भोसरी पोलीस तपास करीत आहेत.
प्रतिनिधी: शाम शिरसाठ पुणे
