ग्रामसेवकांना आता बायोमेट्रिक आणि GPS हजेरी अनिवार्य; गैरहजेरीवर कारवाईचा इशारा
मुंबई : महाराष्ट्र शासनाच्या ग्रामविकास विभागाने राज्यातील ग्रामसेवकांसाठी महत्त्वाचा निर्णय घेतला असून, आता ग्रामसेवकांची हजेरी बायोमेट्रिक आणि GPS प्रणालीद्वारे डिजिटल पद्धतीने नोंदविणे अनिवार्य करण्यात आले आहे. या निर्णयामुळे ग्रामपंचायत स्तरावरील कर्मचाऱ्यांच्या उपस्थितीवर अधिक प्रभावीपणे नियंत्रण ठेवता येणार आहे.
राज्यातील सर्व ग्रामसेवक अर्थात ग्रामपंचायत अधिकाऱ्यांना त्यांच्या नियुक्तीच्या ठिकाणी डिजिटल पद्धतीने हजेरी नोंदवावी लागणार आहे. यासाठी बायोमेट्रिक प्रणालीसोबत GPS आधारित उपस्थिती नोंदणीचा वापर केला जाणार आहे.
या निर्णयाची प्रभावी अंमलबजावणी करण्यासाठी राज्यातील सर्व जिल्हा परिषदांच्या मुख्य कार्यकारी अधिकाऱ्यांना (CEO) आवश्यक निर्देश देण्यात आले आहेत. संबंधित अधिकाऱ्यांनी आपल्या कार्यक्षेत्रातील ग्रामसेवकांची डिजिटल हजेरी व्यवस्था सुनिश्चित करण्याच्या सूचना देण्यात आल्या आहेत.
ग्रामसेवकांच्या वारंवार गैरहजेरीबाबत नागरिकांकडून सातत्याने तक्रारी प्राप्त होत असल्याच्या पार्श्वभूमीवर हा निर्णय घेण्यात आल्याचे सांगण्यात येत आहे. ग्रामसेवक हा ग्रामपंचायत प्रशासनातील महत्त्वाचा घटक असल्याने नागरिकांना विविध शासकीय सेवा आणि योजनांसाठी त्यांच्याशी संपर्क साधावा लागतो. मात्र, अधिकारी किंवा कर्मचारी उपलब्ध नसल्याने नागरिकांना अनेकदा अडचणींचा सामना करावा लागत असल्याच्या तक्रारी आहेत.
आता बायोमेट्रिक आणि GPS प्रणालीमुळे ग्रामसेवक नेमक्या ठिकाणी उपस्थित आहेत की नाही, यावर प्रशासनाला अधिक प्रभावीपणे लक्ष ठेवता येणार आहे. त्यामुळे ग्रामपंचायत पातळीवरील कामकाजात शिस्त आणि पारदर्शकता वाढण्याची अपेक्षा आहे.
दरम्यान, या आदेशाच्या अंमलबजावणीत टाळाटाळ करणाऱ्या किंवा नियमांचे पालन न करणाऱ्या संबंधित कर्मचाऱ्यांवर प्रशासकीय कारवाई करण्यात येईल, असा इशाराही देण्यात आला आहे.
या निर्णयामुळे ग्रामपंचायत स्तरावरील प्रशासन अधिक जबाबदार होण्यास मदत होणार असून, नागरिकांच्या तक्रारींमध्ये घट होण्याची अपेक्षा व्यक्त केली जात आहे.
प्रतिनिधी उमेश कुलकर्णी 9822548429
