ब्राह्मण समाजाच्या प्रलंबित मागण्यांवर लवकरच निर्णय घेणार; मुख्यमंत्री देवेंद्र फडणवीस यांचे आश्वासन
मुंबई:महाराष्ट्रातील ब्राह्मण समाजाच्या गेल्या अनेक वर्षांपासून शासनदरबारी प्रलंबित असलेल्या विविध मागण्या तातडीने मंजूर करून समाजाला न्याय मिळवून दिला जाईल, असे आश्वासन राज्याचे मुख्यमंत्री देवेंद्र फडणवीस यांनी दिले आहे. मंत्रालयात पार पडलेल्या बैठकीनंतर ब्राह्मण समाजाच्या प्रमुख शिष्टमंडळाने मुख्यमंत्र्यांची थेट भेट घेऊन आपल्या मागण्यांचे निवेदन सादर केले.
श्रावण महिन्यातील संकष्टी चतुर्थीच्या शुभमुहूर्तावर विविध ब्राह्मण संघटनांच्या पदाधिकाऱ्यांनी मुंबईतील प्रसिद्ध श्री सिद्धिविनायक मंदिरात दर्शन घेऊन प्रलंबित मागण्या पूर्ण व्हाव्यात, यासाठी साकडे घातले. ‘आधी सिद्धिविनायक आणि नंतर बुद्धिविनायक’ या संकल्पनेतून त्यानंतर शिष्टमंडळाने मंत्रालयात मुख्यमंत्री देवेंद्र फडणवीस यांची भेट घेऊन समाजाच्या विविध प्रश्नांवर सविस्तर चर्चा केली.
या शिष्टमंडळात अखिल भारतीय पेशवा संघटनेचे संस्थापक अध्यक्ष सचिन वाडे पाटील, परशुराम हिंदू सेवा संघाचे संस्थापक अध्यक्ष विश्वजीत देशपांडे, आणि अखिल भारतीय सकल ब्राह्मण महासंघाचे संस्थापक अध्यक्ष डॉ. संजय कुलकर्णी (सुपेकर) यांचा समावेश होता.
बैठकीतील प्रमुख मुद्दे व मागण्या:
महामंडळांच्या कारभारावर नाराजी: राज्य शासनाने ब्राह्मण समाजाच्या आर्थिक व सामाजिक विकासासाठी स्थापन केलेल्या ‘अमृत महामंडळ’ व ‘परशुराम आर्थिक विकास महामंडळ’ यांचा अपेक्षित लाभ समाजाला अद्याप मिळत नसल्याची खंत शिष्टमंडळाने व्यक्त केली.
कागदोपत्री योजनांचा आरोप: या योजना प्रत्यक्षात प्रभावीपणे राबवण्याऐवजी केवळ कागदोपत्रीच सुरू असून त्यात राजकारण होत असल्याचा थेट आरोप मुख्यमंत्र्यांसमोर करण्यात आला.
मुख्यमंत्र्यांचे सकारात्मक आश्वासन: शिष्टमंडळाने मांडलेल्या सर्व गंभीर बाबी मुख्यमंत्र्यांनी गांभीर्याने ऐकून घेतल्या. “या सर्व प्रकरणांत मी स्वतः वैयक्तिक लक्ष घालीन आणि प्रलंबित मागण्यांवर लवकरच सकारात्मक निर्णय घेईन,” असा शब्द मुख्यमंत्र्यांनी दिला असल्याचे डॉ. संजय कुलकर्णी (सुपेकर) यांनी सांगितले.
मुख्यमंत्र्यांसोबत झालेली ही थेट आणि सविस्तर चर्चा ब्राह्मण समाजाच्या मागण्यांच्या पूर्ततेसाठी अत्यंत महत्त्वपूर्ण मानली जात आहे.
प्रतिनिधी उमेश कुलकर्णी 9822548429
