पुणे हादरले! पर्वती पायथा परिसरात ९ वर्षीय चिमुकलीवर अत्याचाराचा प्रयत्न
पुणे: भोर तालुक्यातील नसरापूर येथील संतापजनक घटनेनंतर काहीच दिवसांत पुणे शहर पुन्हा एका धक्कादायक प्रकाराने हादरले आहे. पर्वती पायथा परिसरात ५० वर्षीय व्यक्तीने ९ वर्षीय चिमुकलीवर अत्याचाराचा प्रयत्न केल्याची गंभीर घटना समोर आली आहे. स्थानिक नागरिकांच्या वेळीच सतर्कतेमुळे मोठा अनर्थ टळला असला, तरी या प्रकारामुळे शहरभर संतापाचे वातावरण निर्माण झाले आहे.
मंगळवारी (५ मे २०२६) रात्री पर्वती पायथा परिसरात ही घटना घडल्याची माहिती समोर आली. संशयिताने चिमुकलीला निर्जनस्थळी नेऊन तिच्यावर अत्याचार करण्याचा प्रयत्न केल्याचा आरोप आहे. मात्र, परिसरातील जागरूक नागरिकांनी संशयास्पद हालचाली ओळखून तातडीने हस्तक्षेप केला. नागरिकांनी आरोपीला पकडून पोलिसांच्या ताब्यात दिले.
घटनेची माहिती परिसरात पसरताच मोठ्या संख्येने नागरिक पर्वती पोलीस ठाण्याबाहेर जमा झाले. “आरोपीला कठोर शिक्षा झालीच पाहिजे”, “मुली सुरक्षित कधी?” अशा घोषणांनी परिसर दणाणून गेला. परिस्थिती तणावपूर्ण झाल्याने पोलिसांनी अतिरिक्त बंदोबस्त तैनात केला.
५० वर्षीय संशयित आरोपी ताब्यात
पीडित मुलीची वैद्यकीय तपासणी
POCSO कायद्यांतर्गत गुन्हा दाखल केला आहे
नसरापूर घटनेनंतर पुण्यात पुन्हा अल्पवयीन मुलीवर अत्याचाराचा प्रयत्न झाल्याने पालकवर्गात भीतीचे वातावरण आहे. बालसुरक्षेचा प्रश्न पुन्हा ऐरणीवर आला असून, शहरातील कायदा-सुव्यवस्थेबाबत गंभीर प्रश्न उपस्थित होत आहेत.
नागरिकांचे आवाहन
स्थानिक नागरिकांनी प्रशासनाकडे बालसुरक्षेसाठी अधिक कठोर उपाययोजना, संवेदनशील भागांत गस्त वाढवणे आणि आरोपींवर जलदगती न्यायालयात खटले चालवण्याची मागणी केली आहे. पुणेकरांनीही आपल्या परिसरात सतर्क राहून संशयास्पद हालचालींची त्वरित माहिती पोलिसांना देण्याचे आवाहन करण्यात येत आहे.
पुण्यातील सलग घडणाऱ्या अशा घटनांमुळे “चिमुकल्यांची सुरक्षितता नेमकी कुठे?” हा प्रश्न अधिक तीव्र झाला आहे.
प्रतिनिधी उमेश कुलकर्णी
