’पॅनिक होऊ नका, पेट्रोल-डिझेलचा पुरवठा सुरळीत राहील’; उपमुख्यमंत्री देवेंद्र फडणवीस यांचे जनतेला आवाहन
राज्यात सध्या काही ठिकाणी पेट्रोल आणि डिझेलच्या तुटवड्याच्या अफवा पसरत असल्याच्या पार्श्वभूमीवर उपमुख्यमंत्री देवेंद्र फडणवीस यांनी जनतेला महत्त्वाचे आवाहन केले आहे. “नागरिकांनी घाबरून जाऊन पेट्रोल-डिझेलची साठवणूक करू नये,” असे त्यांनी स्पष्ट केले आहे.
फडणवीस म्हणाले की, जागतिक परिस्थिती आव्हानात्मक असली तरी आपण आपली पुरवठा साखळी (Supply Chain) मजबूत ठेवली आहे. केंद्र सरकारकडे इंधनाचा पुरेसा स्ट्रॅटेजिक साठा उपलब्ध आहे. मात्र, जर नागरिकांनी मोठ्या प्रमाणावर ‘पॅनिक बायिंग’ (घाबरून खरेदी) केली, तर त्याचा ताण पुरवठा साखळीवर पडू शकतो आणि व्यवस्था विस्कळीत होऊ शकते.
महत्त्वाचे मुद्दे:
अफवांवर विश्वास ठेवू नका.
पेट्रोल आणि डिझेलचा वापर गरजेनुसार आणि काळजीपूर्वक करा.
पुरवठा साखळी सुरळीत ठेवण्यासाठी प्रशासनाला सहकार्य करा.
राज्यातील इंधन पुरवठा खंडित होणार नाही, याची काळजी सरकार घेत असून नागरिकांनी संयम बाळगावा, अशी विनंती त्यांनी या प्रसंगी केली.
पत्रकार उमेश कुलकर्णी
