मुंबईकरांच्या खिशाला कात्री; सीएनजी ८६ रुपये, पीएनजी ५२ रुपये
मुंबई | प्रतिनिधी : उमेश कुलकर्णी
पेट्रोल आणि डिझेलच्या वाढत्या किमतींमुळे आधीच सर्वसामान्य नागरिक त्रस्त असताना आता सीएनजी (CNG) आणि घरगुती पीएनजी (PNG) गॅसच्या दरातही वाढ करण्यात आली आहे. नवीन दर ३० मेपासून लागू झाले असून याचा थेट परिणाम वाहनधारक आणि घरगुती ग्राहकांवर होणार आहे.
नवीन दरानुसार सीएनजीच्या किमतीत प्रति किलो २ रुपयांची वाढ करण्यात आली असून मुंबईतील सीएनजीचा दर आता ८६ रुपये प्रति किलो झाला आहे. त्यामुळे ऑटो-रिक्षा, टॅक्सी चालक तसेच सीएनजीवर चालणाऱ्या खासगी वाहनधारकांच्या खर्चात वाढ होणार आहे.
याशिवाय घरगुती वापरासाठी पुरविण्यात येणाऱ्या पीएनजीच्या दरात प्रति युनिट ५० पैशांची वाढ करण्यात आली आहे. त्यानुसार पीएनजीचा दर आता ५२ रुपये प्रति युनिट झाला आहे. या दरवाढीमुळे सर्वसामान्यांच्या मासिक घरगुती बजेटवर अतिरिक्त भार पडण्याची शक्यता आहे.
गेल्या काही महिन्यांपासून इंधन दरवाढीचा फटका नागरिकांना बसत आहे. अशातच सीएनजी आणि पीएनजीच्या दरवाढीमुळे वाहतूक खर्च वाढण्याबरोबरच इतर वस्तू आणि सेवांच्या किमतींवरही परिणाम होण्याची शक्यता व्यक्त केली जात आहे.
दरवाढीबाबत वाहनचालक आणि ग्राहक संघटनांकडून नाराजी व्यक्त होण्याची शक्यता असून, यावर सरकार आणि गॅस वितरण कंपन्यांची भूमिका काय राहणार याकडे सर्वांचे लक्ष लागले आहे.
