डॉ. आनंद बल्लाळ यांना २५ व्या विवाह वर्धापनदिनानिमित्त २५ पुस्तकांची आगळीवेगळी अनमोल भेट
गडहिंग्लज : वाढदिवस किंवा विवाह वर्धापनदिन म्हटला की महागड्या भेटवस्तू, फुलांचे गुच्छ किंवा मोठ्या पार्ट्यांचा ट्रेंड पाहायला मिळतो. मात्र, कोल्हापूर जिल्ह्यातील गडहिंग्लज येथील डॉ. आनंद बल्लाळ यांच्या कुटुंबाने विवाहाच्या २५ व्या वर्धापनदिनानिमित्त एक आगळावेगळा आणि प्रेरणादायी आदर्श समाजासमोर ठेवला आहे.
विवाहाच्या रौप्य महोत्सवानिमित्त पत्नी वैष्णवी, मुलगा पियुष आणि मुलगी श्रावणी यांनी डॉ. आनंद बल्लाळ यांना तब्बल २५ पुस्तकांचा संच भेट देत ज्ञान आणि वाचन संस्कृतीप्रती असलेला सन्मान व्यक्त केला.
डॉ. आनंद बल्लाळ हे वाचन चळवळीचे अभ्यासू आणि समर्पित कार्यकर्ते म्हणून ओळखले जातात. त्यांच्या **’आनंद डोळ्यांच्या पुस्तक लायब्ररी’**मध्ये सुमारे २५ हजारांहून अधिक पुस्तके वाचकांसाठी उपलब्ध असून, अनेक वर्षांपासून ते वाचन संस्कृतीचा प्रसार करण्यासाठी कार्यरत आहेत.
या अनोख्या भेटीबद्दल डॉ. बल्लाळ यांनी समाजमाध्यमांवर आनंद व्यक्त करत पत्नी वैष्णवी, मुलगा पियुष आणि मुलगी श्रावणी यांचे मनःपूर्वक आभार मानले. ही भेट आपल्या आयुष्यातील सर्वात मौल्यवान आणि संस्मरणीय भेट असल्याची भावना त्यांनी व्यक्त केली.
पाश्चात्त्य संस्कृतीच्या प्रभावामुळे भौतिक भेटवस्तूंना वाढते महत्त्व मिळत असताना, पुस्तकांसारखी ज्ञानरूपी भेट देत बल्लाळ कुटुंबाने समाजासमोर एक प्रेरणादायी आदर्श निर्माण केला आहे. या उपक्रमाचे सर्व स्तरांतून कौतुक होत असून, वाचन संस्कृती जपण्याचा हा संदेश अनेकांसाठी प्रेरणादायी ठरत आहे.
प्रतिनिधी उमेश कुलकर्णी
982254812
