महापालिका आरोग्य व वैद्यकीय समिती स्थापनेला अखेर मूर्त स्वरूप! शहर सुधारणा समिती सदस्य डॉ. सुहास कांबळे
महापालिका सर्वसाधारण सभेत कामकाजाचे क्षेत्र व अधिकार निश्चितीचा प्रस्ताव
पिंपरी-चिंचवड शहरातील आरोग्य व वैद्यकीय सेवांचा दर्जा उंचावण्यासाठी स्वतंत्र आरोग्य व वैद्यकीय समिती स्थापन करण्याची मागणी सातत्याने लावून धरणारे शहर सुधारणा समिती सदस्य तथा नगरसेवक डॉ. सुहास कांबळे यांच्या पाठपुराव्याला अखेर यश मिळाले आहे. महापालिका सभेने विशेष समिती स्थापन करण्यास यापूर्वी मान्यता दिल्यानंतर आता या समितीचे कामकाजाचे क्षेत्र, अधिकार व कर्तव्ये निश्चित करण्याचा प्रस्ताव सर्वसाधारण सभेसमोर मंजुरीसाठी ठेवण्यात आला आहे.
महाराष्ट्र महानगरपालिका अधिनियमाच्या कलम ३० (१) अन्वये “आरोग्य व वैद्यकीय समिती” या विशेष समितीची स्थापना करण्यास महापालिका सभेने ५ मे २०२६ रोजी मान्यता दिली होती. त्यानुसार समितीच्या अधिकार व कार्यक्षेत्राबाबतचा प्रस्ताव विधी समितीनेही मंजूर केला असून, आता अंतिम मान्यतेसाठी तो सर्वसाधारण सभेपुढे ठेवण्यात आला आहे.
भाजपा आमदार महेश लांडगे यांच्या मार्गदर्शनाखाली नगरसेवक डॉ. सुहास कांबळे यांनी शहरातील वाढती लोकसंख्या, आरोग्य विषयक वाढत्या गरजा, महापालिकेच्या रुग्णालयांचे सक्षमीकरण, प्रतिबंधात्मक आरोग्य सेवा, जैववैद्यकीय कचरा व्यवस्थापन, राष्ट्रीय आरोग्य अभियानाची प्रभावी अंमलबजावणी आणि पशुसंवर्धन विभागाशी संबंधित आरोग्य विषयक बाबींचा स्वतंत्र व सखोल पद्धतीने विचार होण्यासाठी स्वतंत्र आरोग्य व वैद्यकीय समितीची आवश्यकता अधोरेखित केली होती. यासाठी त्यांनी सातत्याने पाठपुरावा केला होता.
