जळगाव: नेरीनाका चौफुलीवर वाहतुकीचा खोळंबा; सिग्नल यंत्रणा ठरतेय पांढरा हत्ती
जळगाव: शहरातील अत्यंत गजबजलेल्या नेरीनाका चौफुलीवर वाहतुकीची भीषण कोंडी होत असून, प्रशासनाच्या दुर्लक्षामुळे वाहनधारक आणि नागरिक त्रस्त झाले आहेत. विशेष म्हणजे, या ठिकाणी बसवलेले ट्रॅफिक सिग्नल २४ तास बंद असल्याने आणि पोलिसांकडूनही गर्दीवर नियंत्रण मिळवणे कठीण जात असल्याने अपघातांचे प्रमाण वाढले आहे.
वाहतुकीचा ताण आणि धोके
नेरीनाका चौफुली हे टॉवर चौकाकडून येणारी आणि अजंठा चौफुलीकडून येणाऱ्या जड व हलक्या वाहनांचे मुख्य संगम केंद्र आहे. या मार्गावरून दिवसभर मोठ्या प्रमाणात वाहनांची वर्दळ असते. मात्र, सिग्नल व्यवस्था पूर्णपणे कोलमडलेली असल्याने येथे वाहनांच्या लांबच लांब रांगा लागतात. बेशिस्त वाहतुकीमुळे अनेकदा वाहने एकमेकांना धडकण्याच्या घटना घडत आहेत, ज्यामुळे वाहनधारकांमध्ये संतापाचे वातावरण आहे.
या ठिकाणी वाहतूक पोलिसांची नियुक्ती असूनही गर्दी इतकी प्रचंड असते की ती हाताबाहेर जाते. कर्मचाऱ्यांकडून वाहतूक नियंत्रित करण्याचे प्रयत्न अपुरे पडत असल्याचे चित्र रोजच पाहायला मिळते. ट्रॅफिक सिग्नल केवळ शोभेच्या वस्तू बनल्या आहेत, असे स्थानिकांचे म्हणणे आहे.
निवेदनानंतरही स्थिती जैसे थे
वाहतूक शाखेला काही दिवसांपूर्वीच या समस्येबाबत लेखी निवेदन देऊन उपाययोजना करण्याची मागणी करण्यात आली होती. मात्र, अद्यापपर्यंत प्रशासनाने कोणतीही ठोस पावले उचललेली नाहीत. या दुर्लक्षामुळे एखाद्या मोठ्या अपघाताची वाट प्रशासन पाहत आहे का, असा सवाल आता उपस्थित केला जात आहे.
नेरीनाका चौफुलीवरील ही कोंडी फोडण्यासाठी सिग्नल यंत्रणा तातडीने सुरू करावी आणि येथे अतिरिक्त पोलिस बंदोबस्त तैनात करावा, अशी मागणी नागरिकांकडून जोर धरत आहे.
पत्रकार सुमेश मुळे
