संजय पाटलांच्या वक्तव्यावरून पत्रकार संघटनांचा संताप; कारवाईची मागणी
मुंबई, दि. २५ :
खासदार संजय दिना पाटील यांनी पत्रकारांना शिवीगाळ करत जीवे मारण्याची धमकी दिल्याचा आरोप झाल्यानंतर राज्यभरातील पत्रकार संघटनांनी तीव्र संताप व्यक्त केला आहे. या घटनेचा निषेध करत विविध पत्रकार संघटनांनी संबंधित खासदारांवर कठोर कारवाई करण्याची मागणी केली आहे.
मुंबई मराठी पत्रकार संघ, महाराष्ट्र राज्य पत्रकार संघ तसेच इतर अनेक पत्रकार संघटनांनी या प्रकरणाचा जाहीर निषेध नोंदवला आहे. पत्रकारांशी असभ्य भाषेत वागणे आणि धमकी देणे हे लोकशाहीतील प्रसारमाध्यमांच्या स्वातंत्र्यावर आघात असल्याचे संघटनांनी म्हटले आहे.
या वादावर राज्याचे उपमुख्यमंत्री एकनाथ शिंदे यांनीही प्रतिक्रिया दिली असून, अशा प्रकारचे वर्तन अयोग्य असल्याचे स्पष्ट केले आहे. तसेच संजय दिना पाटील यांनी पत्रकारांची जाहीर माफी मागावी, अशा सूचना दिल्याचे त्यांनी सांगितले.
दरम्यान, वाढत्या दबावानंतर खासदार संजय दिना पाटील यांनी व्हिडिओ संदेशाद्वारे पत्रकार बांधवांची मनापासून दिलगिरी व्यक्त केली. आपल्या वक्तव्यामुळे कोणाच्या भावना दुखावल्या असतील तर त्याबद्दल माफी मागत असल्याचे त्यांनी नमूद केले.
मात्र, केवळ माफी पुरेशी नसून संबंधित प्रकरणाची चौकशी करून योग्य ती कारवाई करण्यात यावी, अशी मागणी पत्रकार संघटनांनी कायम ठेवली आहे. या प्रकरणामुळे राजकीय आणि पत्रकारिता क्षेत्रात मोठी चर्चा सुरू झाली असून पुढील घडामोडींवर सर्वांचे लक्ष लागले आहे.
पत्रकार उमेश कुलकर्णी
9822548429
