गोव्यातील बागा बीचवर पर्यटकाचा बुडून दुर्दैवी मृत्यू; मॉन्सूनमधील प्रचंड लाट ठरली जीवघेणी
गोव्यात पर्यटनासाठी गेलेल्या एका पर्यटकाचा समुद्रात बुडून मृत्यू झाल्याची धक्कादायक घटना समोर आली आहे. मॉन्सूनमुळे समुद्र प्रचंड खवळलेला असताना ही दुर्घटना घडल्याने परिसरात मोठी हळहळ व्यक्त केली जात आहे.
मिळालेल्या माहितीनुसार, मृत पर्यटक हा कर्नाटकातील विजापूर येथील ३३ वर्षीय युवक होता. तो बागा बीचवर समुद्रकिनाऱ्यालगत असलेल्या एका खडकावर बसून समुद्राचे दृश्य पाहत होता. याच दरम्यान अचानक आलेल्या एका प्रचंड लाटेने त्याला जोरदार धक्का देत समुद्रात ओढून नेले. समुद्रातील तीव्र प्रवाह आणि उंच लाटांमुळे तो पाण्यात अडकला. स्वतःला वाचवण्यासाठी त्याने शर्थीचे प्रयत्न केले, मात्र खवळलेल्या समुद्रासमोर त्याचे प्रयत्न अपुरे पडले.
घटनेची माहिती मिळताच स्थानिक पोलीस, लाईफगार्ड आणि बचाव पथक तातडीने घटनास्थळी दाखल झाले. समुद्रातील प्रतिकूल परिस्थिती आणि मोठ्या लाटांचा सामना करत बचाव पथकाने शोधमोहीम सुरू केली. काही तासांच्या अथक प्रयत्नांनंतर संबंधित पर्यटकाचा मृतदेह समुद्रातून बाहेर काढण्यात आला.
या दुर्दैवी घटनेनंतर स्थानिक प्रशासनाने मॉन्सूनच्या काळात समुद्रकिनाऱ्यांवर पर्यटकांना विशेष खबरदारी घेण्याचे आवाहन केले आहे. खवळलेल्या समुद्रात उतरणे, पोहणे, धोकादायक खडकांवर बसणे किंवा सुरक्षा रक्षक आणि प्रशासनाने दिलेल्या सूचनांकडे दुर्लक्ष करणे जीवघेणे ठरू शकते, असा इशारा प्रशासनाकडून देण्यात आला आहे. या प्रकरणी पोलिसांकडून पुढील कायदेशीर तपास सुरू आहे.
पत्रकार उमेश कुलकर्णी
9822548429
