धावत्या दाणापूर-सिकंदराबाद एक्सप्रेसमध्ये नागपूरच्या महिलांचा विनयभंग; रेल्वे प्रशासन आणि पोलिसांची उदासीनता
दाणापूर-सिकंदराबाद एक्सप्रेसमध्ये एक संतापजनक प्रकार समोर आला आहे. या ट्रेनच्या आरक्षित डब्यामध्ये घुसलेल्या अनधिकृत प्रवाशांच्या गर्दीत नागपूरच्या महिला प्रवाशांचा विनयभंग करण्यात आल्याची धक्कादायक घटना घडली आहे. विशेष म्हणजे, या घटनेबाबत रेल्वे हेल्पलाईनवर मदत मागूनही कोणतीही तात्काळ मदत मिळाली नाही.
मदत न मिळाल्याने अखेर संतापलेल्या महिलांनी नैनी स्थानकावर ट्रेन रोखून धरली. मात्र, रेल्वे पोलिसांनी कारवाई करण्याऐवजी उलट आरोपी शोधण्याची जबाबदारी पीडित महिलांवरच टाकल्याचा गंभीर आरोप केला जात आहे. अत्यंत धक्कादायक बाब म्हणजे, रात्रीच्या वेळी डब्यातील लाईट बंद करून महिलांशी पुन्हा गैरवर्तन करण्यात आले. या सर्व प्रकारानंतर नागपूर लोहमार्ग पोलिसांनी (GRP) पीडितांना उत्तर प्रदेशात जाऊन तक्रार करण्याचा सल्ला दिला आहे. रेल्वे सुरक्षा आणि पोलिसांच्या या उदासीन भूमिकेमुळे प्रवाशांच्या सुरक्षेचा प्रश्न पुन्हा एकदा ऐरणीवर आला असून तीव्र संताप व्यक्त होत आहे.
प्रतिनिधी उमेश कुलकर्णी
