ठाणे महापालिका मुख्यालयाबाहेर भव्य राजकीय बॅनर कोसळला; कारचे नुकसान, जीवितहानी टळली
ठाणे : ठाणे महानगरपालिका (TMC) मुख्यालयाबाहेर आज सकाळी एक मोठी दुर्घटना घडली. मुख्यालयाबाहेर उभारण्यात आलेला भव्य राजकीय बॅनर अचानक कोसळून खाली पार्क केलेल्या एका कारवर पडला. या घटनेत कारचे मोठे नुकसान झाले असून सुदैवाने कोणतीही जीवितहानी झाली नाही.
घटना घडली तेव्हा संबंधित कारमध्ये कोणीही नसल्याने मोठा अनर्थ टळला. तसेच, त्या वेळी परिसरातून जाणाऱ्या नागरिकांनाही कोणतीही दुखापत झाली नसल्याची माहिती मिळाली आहे.
घटनेनंतर परिसरात काही काळ गोंधळाचे वातावरण निर्माण झाले. माहिती मिळताच ठाणे महानगरपालिका प्रशासन, अग्निशमन दल आणि संबंधित यंत्रणांची पथके घटनास्थळी दाखल झाली. कोसळलेला बॅनर हटवण्याचे काम तातडीने हाती घेण्यात आले.
या घटनेमुळे सार्वजनिक ठिकाणी उभारण्यात येणाऱ्या मोठ्या राजकीय बॅनर्सच्या सुरक्षिततेचा मुद्दा पुन्हा एकदा ऐरणीवर आला आहे. विशेषतः मान्सूनच्या पार्श्वभूमीवर अशा बॅनर्सची सुरक्षितता, परवानग्या आणि नियमित तपासणी याबाबत प्रशासनाने अधिक दक्षता घेण्याची गरज व्यक्त केली जात आहे.
या प्रकरणी बॅनर उभारण्यास परवानगी देण्यात आली होती का, तसेच या दुर्घटनेला नेमके काय कारणीभूत ठरले, याचा तपास सुरू असून अधिक माहितीची प्रतीक्षा आहे.
प्रतिनिधी सिंथिया कोरिया मुंबई
