शिवाजीनगर-हिंजवडी मेट्रोचा पहिला टप्पा पूर्ण; अत्याधुनिक तंत्रज्ञानाने सज्ज, उद्घाटनाची प्रतीक्षा कायम
पुणे : पुणेकरांसाठी महत्त्वाच्या ठरणाऱ्या शिवाजीनगर ते हिंजवडी मेट्रो लाईन-३ च्या पहिल्या टप्प्याचे सुमारे १३.३ किलोमीटरचे बांधकाम पूर्ण झाले आहे. त्यामुळे हिंजवडी आयटी पार्क ते शिवाजीनगर हा प्रवास अधिक वेगवान आणि सोयीस्कर होणार आहे. सध्या या मार्गाचे काम पूर्ण झाले असले तरी प्रवासी सेवा सुरू करण्यासाठी अधिकृत उद्घाटनाची तारीख अद्याप निश्चित झालेली नाही.
या मेट्रो मार्गाचे आणखी एक वैशिष्ट्य म्हणजे येथे अत्याधुनिक ‘थर्ड रेल इलेक्ट्रिफिकेशन’ तंत्रज्ञानाचा वापर करण्यात आला आहे. ओव्हरहेड विद्युत तारांऐवजी रेल्वे रुळांच्या माध्यमातून मेट्रोला वीजपुरवठा केला जाणार आहे. त्यामुळे या मार्गाला आधुनिक आणि तंत्रज्ञानाच्या दृष्टीने विशेष महत्त्व प्राप्त झाले आहे.
मेट्रो सेवा सुरू झाल्यानंतर हिंजवडी आयटी पार्क आणि शिवाजीनगरदरम्यानचा प्रवासाचा वेळ मोठ्या प्रमाणात कमी होण्याची अपेक्षा आहे. सध्या या प्रवासासाठी वाहतूक कोंडीमुळे दीड तास किंवा त्याहून अधिक वेळ लागू शकतो; मेट्रोमुळे हा प्रवास सुमारे ४५ मिनिटांत पूर्ण होण्याची अपेक्षा आहे.
मार्ग प्रवासी सेवेसाठी सज्ज झाल्याने आता पुणेकरांचे लक्ष उद्घाटनाच्या अधिकृत तारखेकडे लागले आहे. उद्घाटनाची तारीख निश्चित झाल्यानंतर मेट्रो सेवा नागरिकांसाठी सुरू होण्याचा मार्ग मोकळा होणार आहे.
प्रतिनिधी उमेश कुलकर्णी
