वीर सावरकर हे केवळ स्वातंत्र्यसैनिक नव्हे, तर भाषासमृद्धीचे महान शिल्पकार — अमित शाह
नवी मुंबई : हिंदी दिवसानिमित्त आयोजित कार्यक्रमात केंद्रीय गृहमंत्री अमित शाह यांनी स्वातंत्र्यवीर विनायक दामोदर सावरकर यांच्या भाषिक योगदानाचा गौरव केला. सावरकर हे केवळ महान स्वातंत्र्यसैनिक नव्हते, तर भाषेचा सखोल अभ्यास करणारे आणि भारतीय भाषांना समृद्ध करणारे व्यक्तिमत्त्व होते, असे शाह यांनी नमूद केले.
सावरकरांनी मराठीसह भारतीय भाषांमध्ये आधुनिक संकल्पना व्यक्त करण्यासाठी अनेक नवीन आणि प्रभावी शब्दांची निर्मिती केली. त्यांच्या या भाषासमृद्धीच्या कार्यामुळे मराठी भाषेच्या विकासाला महत्त्वपूर्ण योगदान मिळाले, असे अमित शाह यांनी सांगितले.
यावेळी त्यांनी मातृभाषेतून शिक्षण घेण्याच्या महत्त्वावरही भर दिला. विद्यार्थ्यांना त्यांच्या मातृभाषेत शिक्षण मिळाल्यास ज्ञान आत्मसात करण्याची क्षमता अधिक प्रभावी होते, असे त्यांनी स्पष्ट केले.
पंतप्रधान नरेंद्र मोदी यांच्या नेतृत्वाखाली मराठी भाषेला अभिजात भाषेचा दर्जा मिळाल्याचा उल्लेख करत, भारतीय भाषांचा सन्मान आणि संवर्धन करण्यासाठी केंद्र सरकारकडून प्रयत्न सुरू असल्याचेही अमित शाह यांनी अधोरेखित केले.
भाषा ही केवळ संवादाचे माध्यम नसून संस्कृती, इतिहास आणि अस्मितेची ओळख आहे. त्यामुळे भारतीय भाषांचे जतन आणि संवर्धन ही सामूहिक जबाबदारी असल्याचा संदेश या कार्यक्रमातून देण्यात आला.
प्रतिनिधी उमेश कुलकर्णी
