पालघरमध्ये १७ कोटींच्या चांदीची व्हॅन उलटली; महामार्गावर तणावपूर्ण वातावरण, पोलिसांचा कडेकोट बंदोबस्त
पालघर | प्रतिनिधी :
मुंबई-अहमदाबाद राष्ट्रीय महामार्गावर आज सकाळी एक मोठी आणि थरारक घटना घडली. कोट्यवधी रुपयांच्या चांदीच्या विटा घेऊन जाणारी एक भरधाव व्हॅन पालघर जिल्ह्यातील डहाणू तालुक्यात चारोती उड्डाणपुलावर अचानक उलटल्याने परिसरात एकच खळबळ उडाली. या व्हॅनमध्ये तब्बल ६०० किलो चांदी असल्याची माहिती समोर आली असून तिची बाजारमूल्य अंदाजे १७ कोटी रुपये असल्याचे सांगितले जात आहे.
प्राथमिक माहितीनुसार, ही व्हॅन मुंबईहून गुजरातमधील वापीच्या दिशेने जात होती. चारोती उड्डाणपुलाजवळ पोहोचताच चालकाचे वाहनावरील नियंत्रण सुटले आणि भरधाव वेगातील व्हॅन रस्त्यावर पलटी झाली. अपघात इतका जोरदार होता की वाहनाचे मोठे नुकसान झाले. अपघातानंतर काही काळ महामार्गावर भीती आणि गोंधळाचे वातावरण निर्माण झाले होते.
व्हॅनमध्ये मोठ्या प्रमाणावर मौल्यवान चांदी असल्याची माहिती मिळताच स्थानिक पोलिसांनी तातडीने घटनास्थळी धाव घेतली. संपूर्ण परिसर पोलिसांनी बंदोबस्ताखाली घेतला आणि कोणतीही अनुचित घटना घडू नये म्हणून सुरक्षा वाढवण्यात आली. महामार्गावर काही वेळ कडेकोट पोलीस बंदोबस्त पाहायला मिळाला. सुदैवाने, चांदीचा साठा सुरक्षित असल्याची माहिती प्रशासनाकडून देण्यात आली असून कोणतीही लूट किंवा चोरी झालेली नाही.
या घटनेमुळे मुंबई-अहमदाबाद महामार्गावरील गुजरातकडे जाणारी वाहतूक काही काळ विस्कळीत झाली होती. अपघातग्रस्त व्हॅन रस्त्याच्या मध्यभागी उलटल्याने वाहनांच्या लांबच लांब रांगा लागल्या होत्या. नंतर क्रेनच्या सहाय्याने वाहन बाजूला हटवण्यात आले आणि वाहतूक हळूहळू पूर्ववत करण्यात आली.
दरम्यान, या अपघातात चालक आणि व्हॅनमधील कर्मचारी किरकोळ जखमी झाल्याची माहिती समोर आली आहे. जखमींवर स्थानिक रुग्णालयात उपचार करण्यात आले. पोलिसांनी पंचनामा करून पुढील तपास सुरू केला असून, चांदीचा साठा सुरक्षितपणे मालकाच्या ताब्यात देण्याची प्रक्रिया सुरू असल्याचे सांगण्यात आले आहे.
पत्रकार उमेश कुलकर्णी
9822548429
