ज्येष्ठ समाजवादी नेते डॉ. कुमार सप्तर्षी यांचे ८५ व्या वर्षी निधन
पुणे : युवक क्रांती दल (युक्रांत)चे संस्थापक, ज्येष्ठ समाजवादी नेते आणि माजी आमदार डॉ. कुमार सप्तर्षी यांचे रविवारी वयाच्या ८५ व्या वर्षी वृद्धत्वामुळे निधन झाले. त्यांच्या निधनाने महाराष्ट्राच्या सामाजिक, राजकीय आणि वैचारिक क्षेत्रावर शोककळा पसरली असून विविध स्तरांतून हळहळ व्यक्त केली जात आहे.
डॉ. कुमार सप्तर्षी हे डॉ. राममनोहर लोहिया यांच्या समाजवादी विचारांचे तसेच डॉ. बाबासाहेब आंबेडकर यांच्या सामाजिक न्यायाच्या तत्त्वांचे कट्टर समर्थक होते. युवक क्रांती दलाच्या माध्यमातून त्यांनी अनेक सामाजिक चळवळी उभारल्या आणि अन्याय, भ्रष्टाचार तसेच विषमतेविरोधात आयुष्यभर संघर्ष केला.
माजी आमदार म्हणून त्यांनी जनतेचे प्रश्न प्रभावीपणे विधानसभेत मांडले. तसेच ‘महाराष्ट्र गांधी स्मारक निधी’चे अध्यक्ष म्हणून गांधीवादी विचारांचा प्रसार करण्यासाठीही त्यांनी उल्लेखनीय योगदान दिले. त्यांच्या साधेपणा, स्पष्टवक्तेपणा आणि समाजहिताच्या भूमिकेमुळे त्यांना सर्वपक्षीय नेते, सामाजिक कार्यकर्ते आणि नागरिकांचा मोठा आदर मिळाला होता.
डॉ. कुमार सप्तर्षी यांच्या निधनाने महाराष्ट्राने एक अभ्यासू, निडर आणि समाजपरिवर्तनासाठी अखंड झटणारा विचारवंत गमावला आहे. त्यांच्या पश्चात कुटुंबीयांसह असंख्य सहकारी, कार्यकर्ते आणि चाहत्यांचा मोठा परिवार आहे.
प्रतिनिधी : उमेश कुलकर्णी
