बाळूमामा देवस्थानातील ६०.७५ कोटींच्या कथित गैरव्यवहारप्रकरणी गुन्हा; आर्थिक गुन्हे शाखेकडे तपास
कोल्हापूर : कोल्हापूर जिल्ह्यातील आदमापूर येथील संत सद्गुरू श्री बाळूमामा देवस्थान ट्रस्टमधील ६० कोटी ७५ लाख २८ हजार ६० रुपयांच्या कथित आर्थिक गैरव्यवहारप्रकरणी भुदरगड पोलीस ठाण्यात गुन्हा दाखल करण्यात आला आहे. या प्रकरणाच्या तपासाची जबाबदारी आर्थिक गुन्हे शाखेकडे (EOW) सोपविण्यात आली असून तपासाला वेग आला आहे.
धर्मादाय विभागाच्या तक्रारीनुसार, देवस्थानच्या जमिनींच्या खरेदी-विक्री व्यवहारांमध्ये तसेच ट्रस्टच्या आर्थिक व्यवहारांमध्ये मोठ्या प्रमाणावर अनियमितता झाल्याचा आरोप आहे. या प्रकरणी तत्कालीन धर्मादाय निरीक्षक, ट्रस्टचे सचिव आणि इतर संबंधितांविरुद्ध गुन्हा दाखल करण्यात आला आहे.
प्राथमिक तपासात देवस्थानच्या निधीचा गैरवापर आणि आर्थिक अनियमितता झाल्याचे समोर आल्याचा दावा करण्यात आला आहे. तपास यंत्रणांनी संबंधित कागदपत्रे जप्त करून त्यांची छाननी सुरू केली असून व्यवहारांची सखोल पडताळणी केली जात आहे.
या प्रकरणात संबंधित व्यक्तींविरुद्ध कायदेशीर कारवाईची प्रक्रिया सुरू असून आर्थिक गुन्हे शाखेकडून सर्व पैलूंचा तपास केला जात आहे. तपासानंतर दोषी आढळणाऱ्यांवर कायद्यानुसार कठोर कारवाई करण्यात येणार असल्याचे सांगण्यात आले आहे.
महाराष्ट्रासह कर्नाटक आणि गोव्यातील लाखो भाविकांचे श्रद्धास्थान असलेल्या बाळूमामा देवस्थानातील या कथित आर्थिक गैरव्यवहारामुळे भाविकांमध्ये चिंता व्यक्त केली जात असून, प्रकरणाचा निष्पक्ष आणि सखोल तपास करण्याची मागणी होत आहे.
प्रतिनिधी उमेश कुलकर्णी
